رئيس مجلس الادارةمحمد هاشم - سمير المسلمانى
رئيس التحريرسمير المسلمانى

التعليم وسنينه واللي احنا مستنيينه!!!

التعليم وسنينه واللي احنا مستنيينه!!!

كتبه أ.د/ أشرف فتحي أستاذ الفنون والديكور

خمس سنوات انقضت أو قاربت على الدورة البرلمانية الحالية… خمس سنوات من الجهد الجهيد والفكر العميق والذهاب والإياب وأحياناً الغياب… ومكافآت لاتتناسب مع فكر معالي النايب… حتى لو نام في الجلسة لازم يطوله من الحب جانب… خمس سنين ومعالي النايب لم نسمع منه حديث أو تهميس… وإن سألته عن التعليم يرد على طول…

– ماله التعليم؟؟… التعليم وسنينه وهو احنا ناقصينه… كفاية مشاكل الدايرة..

– عارفين… لازم ابن الدايرة هو اللي يحلها… ايوة بس التعليم فيه مشاكل كثيرة ولازم يتطور!!…

– ماحنا بنطور…

– بتطوروا إيه؟؟ على حد علمي الوزير هو اللي بيطور.. وماشفناش حد منكم قال تعليق أو اعترض على حاجة… كل اللي شفناه أن بيتك بيتطور من دور ونص لـ ست ادوار.. والبدلة اتطورت بعد ماكانت من بورسعيد بقت من فرساتشي… وشكلك اللي كان… بقى ولا نجوم السيما…

– اللهم لاحسد…

– مش قصدي والله.. بس التعليم!!!…

– تاني التعليم… ماتقلقش الخطط اللي فكرنا فيها هاتتنفذ إن شاء الله في الدورة اللي جاية…

– هو معاليك هاتقعد خمس سنين كمان في البرلمان؟؟…

– طبعاً أمال الخطط دي مين هايتابعها..

– ليه هي خطط شخصية؟؟…

– ياأخي انت غلباوي ليه؟؟…

– أصل الكورونا…

– مالها الكورونا هي كمان؟؟…

– التعليم فيها عايز تطوير بشكل جديد!!!…

– ماحنا بالفعل بنفكر فيه… أمال الخمس سنين اللي جايين هانعمل فيهم إيه؟؟؟ …

– ليه هو احنا لسة هانستنى خمس سنين كمان الأهالي يشتروا الأبحاث والعيال تنجح لغاية ماتطوروا…

– يعني العيال تسقط مش عاجب.. العيال تنجح برضه مش عاجب…

– لا يامعالي النايب.. بس كنا عايزين.

– عايزين إيه؟؟ هو انتم مابتبطلوش طلبات!!!

– لا أبداً… بنسأل بس عن وضعنا في التعليم بالنسبة للعالم ياترى صعدنا كام درجة في الخمس سنين اللي فاتت؟؟…

– هو دة اللي انتم شاطرين فيه… تسألوا وماتشتغلوش.

– مانشتغلش؟؟ أمال مين اللي بيشتغل؟؟… دة احنا حتى مابننامش في الجلسات اقصد في الفصول من التعب..

– عامة احنا مش مستنيين منك حاجة… آه… ماهو لو كنت نفعت في حاجة قبل كدة كان ممكن نتعشم في قدراتك… ربنا يسامح اللي كان سامح… كان لازم يعرف إن مافيش مكان اشتغلت فيه معاليك إلا وخرب أو انطردت منه… وبقت عندك عادة… وربنا مايقطعهاعادة.

ربما تحتوي الصورة على: ‏‏٣‏ أشخاص‏

شارك برأيك وأضف تعليق

جميع الحقوق محفوظة لدي جريدة الاخبارالمصرية و مصر اليوم نيوز 2018 ©